Базар-Коргондогу жигиттин бычакталышы. Чыр эмнеден улам келип чыккан

Шектүүнү окуяга күбө болгон адамдар сабап салгандыктан эс-учун жоготуп жатып калган.

 Жалал-Абаддын Базар-Коргон районунда айылдашы тарабынан бычакталган жигит менен шектүү автобекетте орунтук талашып, мушташа кетишкен. Бул тууралуу окуянын күбөлөрү  билдирди.

Эскерте кетсек, каргаша бүгүн эртең менен болгон. Айылдаш жигиттер уруша кетип, 19 жаштагысы бычак жеп каза тапкан.

Күбөнүн айтымында, шектүү менен маркум Базар-Коргон районундагы Арсланбап айылынын тургундары болчу. Алар 7-май күнү эртең менен саат 9:30дар чамасында өз айылына баруу үчүн бир маршрутту күтүп турушкан.

"Шектүү бир аз кызуу абалда эле. Маркум экөө бири-бирин таанычу. Алар маршруттук таксини күтүп жатышкан. Орунтукт аз болгондуктан орун талашып, экөөнүн ортосунда чыр чыкты. Мушташка айланып, шектүү маркумдун арт жагына колундагы бычакты шилтеп жиберди. Бир эле жолу эмес, бир канча жолу далысына бычак урду. Шектүүнүн жакындары ага базардан бычак ала кел дегендиктен, окуядан бир аз мурда колундагы бычакты сатып алган. Ал эми маркум жергиликтүү окуу жайлардын биринин студенти эле. Ал Базар-Коргон районунун борборундагы банктардын биринде практика мөөнөтүн өтөп жүргөн. Бүгүн 7-май күнү шектүү да, маркум да өз айылына жөнөп бараткан", — деди окуянын күбөсү.

Ал эми облустук милициядан окуя боюнча учурда териштирүү иштери жүрүп жаткандыгын, чырдын келип чыгуу себептери такталып жаткандыгын кошумчалады.

Шектүүнү окуяга күбө болгон жарандар сабап салгандыктан, ал да маркумдун жанында эс-учун жоготуп жатып калган.


https://sputnik.kg/incidents/20180507/1039032147/zhigittin-bychaktalyshy.html

"Кыргызмунайгаздын" кызматкери "диплому жасалма" деп соттолууда

Кочкор-Ата шаарында жайгашкан "Кыргызмунайгаз" ишканасында 2011- 2015-жылдар аралыгында коопсуздук кызматынын башчысы жана коомчулук менен байланыш кызматында иштеген Абдимурат Нышанкулов "жасалма диплом менен иштеген" деп айыпталууда. Бул тууралуу ишкананын ыйгарым укуктуу өкүлү жана "Кыргыз Петрелеум" компаниясынын коопсуздук кызматынын жетекчиси Рашид Сулайманов  билдирди.

Анын маалыматына ылайык, Нышанкулов 2011-жылы "Кыргызмунайгазга" жумушка орношууда ОшМУнун юридика адистигин бүтүргөндүгү тууралуу дипломун көрсөтүп, анын көчүрмөсүн калтырган. 3 жыл 7 ай иштеген соң анын жасалма экени аныкталып, райондук милиция Кылмыш-жаза кодексинин 166-беренеси ("Көз боемочулук"), 350-беренеси ("Документ жасалмалоо") менен кылмыш ишин козгогон.

- Ал жасалма диплом менен иштеп турган убагында алган 1 млн. 140 миң сом маянасын кайтарышы керек. Бул багыттагы соттук кароо иштери 17-майда Ноокен райондук сотунда башталганы турат, - деди Сулайманов.

Ал эми Нышанкулов 2011-жылы "Кыргызмунайгаз" ишканасына жетекчиликтин чакыруусу менен барганын билдирет.

- Бир топ окуу жайларга тапшырып, бирок аларды бүтүргөн эмесмин. "Мунайгазга" жумушка орношуп жаткан кезде Жалал-Абад шаарындагы Укук бизнес академиясынын студенти экендигим тууралуу тактама тапшыргам. Мени ошол документ менен жумушка алышкан. 2016-жылы окуу жайынын юриспруденция адистигин аяктадым. Жасалмалуулук болсо мени жумушка алган ошол учурдагы жетекчилик жооп бериши керек, - деди Нышанкулов.

58 жаштагы Абдимурат Нышанкулов 1989-жылдан 1998-жылга чейин облустук ички иштер башкармалыгында да жасалма диплом менен милиционер болуп иштеп жүргөндүгү такталган. Жалал-Абад облустук ички иштер башкармалыгынын Кадрлар бөлүмү берген маалыматка караганда, 1998-жылы анын үстүнөн кызматтык иликтөө жүргүзүлүп, "1991-жылы Анжияндагы техникумду аяктаган" деген диплому жасалма болуп чыккан. Ошол эле жылы милициянын коопсуздук кызматынын башчысынын буйругу менен ички иштер органдарында иштөөдөн биротоло бошотулган. Бул маалыматтарды Нышанкулов "ички иштер кызматындагы кээ бир адамдар менен тирешүүдөн кийинки доомат" катары мүнөздөдү.

"Кыргызмунайгаз" быйыл жыл башынан бери 27 миң тонна нефть, 7 млн. куб газ өндүргөнү расмий кабарланган. Жылдык кирешеси 652 млн. сомду түзгөн ишканада 2500 адам иштейт. Жылына 140 миң тонна нефть өндүрөт.

https://www.azattyk.org/a/29212606.html

Бишкекте тургундар трансформация боюнча митингге чыгышты

Жогорку Кеңештин алдында “Жерлерди трансформация кылуу жөнүндө” мыйзамына байланыштуу нааразылык акциясы өтүп жатат. Бул тууралуу митингдин уюштуруучуларынын бири, "Трансформация кыймылы" уюмунун координатору Мурадыл Балыбаев билдирди.

- Мыйзамдагы жазылган нерселердин баарына макул болдук, бир гана ал мыйзамга Чүй облусунун Сокулук району менен Аламүдүн районун гана киргизбей жатышканына ушул эки райондун эли нааразы болуп чыктык. Жалпы Кыргызстанга болчу мыйзамга ушул эки районду киргизбей коюп жатышат, бөлгөндө бул райондо участок катары берилип, үйлөр салынып кеткен жерлер трансформация болбой калат. Ошондуктан митингге чыккандар биздин да жерлерди, трансформация кылууну талап кылып турабыз, - деди Балыбаев.

Элүүдөй жаран негизинен Сокулук, Аламүдүн районуна караштуу, Бишкек шаарынын жакасындагы жаңы конуштардан келишкен.

Бүгүн Жогорку Кеңештин Агрардык саясат, суу ресурстары, экология жана регионалдык өнүктүрүү боюнча комитетинде Жер тилкелерин трансформациялоо маселеси каралып жатат. Депутаттар бул боюнча мыйзамдын макулдашылган вариантын иштеп чыгыш үчүн түзүлгөн топту өзгөртүү маселесин да карашууда.

Жердин трансформациясы боюнча мыйзам былтыр парламентте үч окууда тең жактырылган. Кийин мурдагы президент Алмазбек Атамбаев каршы пикири бар экенин айтып, ага кол коюудан баш тарткан.

Ал эми "Трансформация" уюмунун өкүлдөрү мыйзамды тезирээк кабыл алууну бийликтен суранып келатышат. Алардын пикиринде, бул мыйзам кабыл алынса 2009-жылы киргизилген мораторийге чейин турак жай курулуп калган айыл чарба багытындагы жерлер трансформацияланып, мыйзамдаштырылмак.

32 райондогу 217 айыл аймагында 1983-2009-жылдары жалпысынан 13 миң гектар жерде 38 миң үй курулган. Ал эми жалпы берилген тилкелердин саны 42 миңдей деп айтылып жүрөт.

https://www.azattyk.org/a/29212768.html

Өкмөт башчы ишин жол тармагынан баштаганы ырым экенин айтты

Премьер-министр Мухаммедкалый Абылгазиев ишин жол тармагындагы ачылыштардан баштап, ырым кылып жатканын айтты. Ал бул тууралуу 7-майда Жалал-Абад аэропортунун жаңы имаратынын ачылыш салтанатында билдирди:

- Жаңы өкмөт келип, мен өкмөт башчы болуп иштеп жатам. Эң биринчи ырым кылып жол тармагынан баштадым. Авиакаттам деле жолго кирет да. Түштөн кийин Араванга барып, 50 метрден ашуун көпүрөнү ачабыз. Биз таза иштеген өкмөт болобуз. Социалдык маселелерди так чечебиз.

Премьер-министр бүгүн Жалал-Абад жана Ош облусуна жумушчу сапары менен барды.

Мухаммедкалый Абылгазиев баштаган өкмөттүн курамын Жогорку Кеңеш 20-апрелде бекитип, президент жаңы дайындоолор боюнча жарлык чыгарган. 

https://www.azattyk.org/a/29212535.html

Өзгөчө пикир

  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
  • 11
  • 12
  • 13
  • 14
  • 15
  • 16
  • 17
  • 18
  • 19
  • 20
  • 21
  • 22
  • 23